ភ្នំពេញ៖ តាមរយៈគណនីហ្វេសប៊ុករបស់នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានបង្ហាញរូបថតដ៏កម្រមួយសន្លឹកដោយមានវត្តមានរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៉ិត សំហេង និងរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា លោក ឯម ច័ន្ទមករា នៅពីក្រោយ។

សម្តេចតេជោ បានសរសេរក្នុងហ្វេសប៊ុកផ្ទាល់ខ្លួនដូច្នេះថា៖ «ទើបឃើញរូបថតដ៍កម្រមួយសន្លឹកទៀតដែលតាមការស្រាវជ្រាវរបស់ឯកឧត្តម អ៉ិត សំហេង គឺថតនៅថ្ងៃ២០ វិច្ឆិកា ១៩៩៩ នៅមុខផ្ទះខ្ញុំនៅវិមានឯករាជ្យក្នុងឱកាសខួប១០ឆ្នាំនៃការផ្តល់សច្ចាបន័លើអនុសញ្ញាស្តីពីសិទ្ធិកុមារ។ ឆ្នាំ១៩៩៩ ខ្ញុំទើបមានអាយុ ៤៧ឆ្នាំដែលពេលនោះនៅលេងបាល់ទាត់និងបាល់ទះនៅឡើយ»។

អមនឹងការបង្ហាញរូបភាពដ៏កម្រនេះ សម្តេចក៏បានឆ្លៀតអំពាវនាវឱ្យពលរដ្ឋរាប់ថយក្រោយ ១០០ថ្ងៃនៃព្រឹត្តិការណ៍ប្រកួតស៊ីហ្គេមលើកទី៣២ និងប៉ារ៉ាហ្គេមលើកទី១២៕